Muqdisho – Iyadoo xusaysa Maalinta Xorriyadda Saxaafadda Adduunka, ayaa Qaramada Midoobay ee Soomaaliya waxay iftiimisay shaqada muhiimka ah ee suxufiyiinta Soomaaliyeed ay ku soo tebiyaan caqabadaha cimilada ee dalkooda haysata waxayna dhiirigelisay in la kordhiyo tebinta.

“Soomaaliya waxay safka hore kaga jirtaa isbeddelka cimilada, iyadoo dhibaatada cimiladu ay saameynayso nolosha malaayiin Soomaali ah, gaar ahaan kuwa ugu nugul. Wax badan oo kale ayaa loo baahan yahay in la sameeyo si kor loogu qaado wacyigelinta ku saabsan dhammaan dhinacyada dhibaatooyinka deegaanka, saxafiyiintana arrintan loogama maarmo,” ayay tiri Ergeyga Gaarka ah ee Xoghayaha Guud ee Qaramada Midoobay u qaabilsan Soomaaliya, Catriona Laing.

"Si ay Soomaaliya u gaarto yoolkeeda ah xasillooni iyo horumar waara, waxaa lagama maarmaan ah in saxafiyiinta ay si sax ah, waqtiyeysan, oo dhameystiran uga warbixiyaan arrimaha deegaanka iyo cawaaqibkooda, iyo sidoo kale arrimaha suurtagalka ah ee lagu xallin karo," ayay raacisay.

Soomaaliya gudaheeda, Qaramada Midoobay waxay taageertaa bulshada rayidka ah si ay uga qaybqaataan xiriirka ka dhexeeya xuquuqda aadanaha iyo isbeddelka cimilada - tani waxaa ka mid ah in la fahmo sida dhibaatooyinka ay cimiladu sababto ay xiriir ula leeyihiin xuquuqda aasaasiga ah ee aadanaha sida xaqa nolosha, xaqa caafimaadka iyo xaqa helitaanka cunto iyo biyo nadiif ah.

Iyadoo qayb ka ah ololaha lagu xusayo Sannadguurada 75-aad ee Baaqa Caalamiga ah ee Xuquuqul Insaanka sannadkii hore, Qaramada Midoobay waxay billowday ololeyaal warbaahineed oo lagu kobcinayo laguna ururinayo aragtida dhallinyarada ee ku aaddan isbeddelka cimilada iyo arrimaha deegaanka si loo maqlo codkooda ku aaddan sida isbeddelka cimiladu u saameynayo Soomaaliya.

Maalinta Xorriyadda Saxaafadda Adduunka, ee uu aasaasay Golaha Loo Dhanyahay ee Qaramada Midoobay sannadkii 1993-kii, ayaa halkudheggeedu yahay sannadkan ‘Saxaafad loogu talagalay Meelaha Dhulka: Saxaafad wajahaysa Xasaradaha Deegaanka’ waxaana si gaar ah loogu talagalay muhiimadda saxaafadda iyo xorriyatul-qowlka marka la eego xaaladda dhibaatada deegaanka caalamiga ah ee hadda jirta.

Ujeedadeedu waa in la muujiyo doorka muhiimka ah ee saxaafadda, suxufinimada, helitaanka iyo faafinta xogtu ay ka ciyaaraan xaqiijinta mustaqbal waara.